鄧炳強：社會平穩但存暗湧 籲慎思明辨

保安局局長鄧炳強表示，社會雖較2019年平穩，但仍存在「暗湧」，每日有人打「擦邊球」犯法。他呼籲市民慎思明辨，並提及皇崗口岸目標第四季啟用。

保安局局長鄧炳強表示，相比2019年，社會平穩了很多，因為有法可依，大部分人都唔敢犯法，但仍然存在「暗湧」，每日都有人搵機會打「擦邊球」犯法，包括煽動他人。

鄧炳強喺一個電台節目話，政府好願意接受批評，如果有做得唔好，市民畀意見，政府一定會聽。但如果目的係煽動對政府或中央政府不信任，就要小心風險。佢強調仲有四大風險，包括外部勢力抹黑、本土恐怖活動、潛逃外國者繼續提倡港獨，以及「軟對抗」。佢形容最邪惡就係「軟對抗」，因為未必好明顯，呼籲市民要慎思明辨。

被問到宏福苑大火後，有咩事件屬於「軟對抗」，鄧炳強舉例話，當時有人喺網上指政府「賤價」收地再以高價賣畀地產商，又有人指消防人員欠缺防火衣等。佢話呢啲都係假消息，目的係分化社會，煽動市民。

另外，鄧炳強被問到皇崗口岸係咪會喺下月12日開通，佢話施政報告明確提出會喺第四季啟用，目標係盡快開通，但必然要確保安全、暢順同有序。

佢相信皇崗口岸開通後，會多咗旅客使用，而之前進行嘅兩萬人測試合適，當局會繼續同各部門合作，確保交通等暢順。