香蕉防黑保鮮實驗：膠袋袋住最見效

日本媒體報道，有實驗室以四種常見方法測試香蕉冷藏防黑效果，結果發現最簡單低成本嘅方法——將每條香蕉分開放入普通膠袋，冷藏三星期後竟然係保鮮效果最好，擊敗其他複雜方式。

香蕉雖然方便又好食，但唔少人都試過買咗一大梳返屋企，未食晒就變黑腐爛，認真頭痛。日本媒體「grape」報道，最近有網上頻道「Cooking Class no Bon-chan」進行咗一個實驗，親自測試四種主流嘅香蕉冷藏防黑方法，睇吓邊種最有效延長保鮮期。

實驗者將香蕉分成四組，分別用唔同方法處理，然後一齊放入雪櫃蔬菜箱冷藏三星期。第一組係用保鮮紙緊緊包住蕉莖，再放入密實袋密封；第二組就將成條香蕉用保鮮紙完全包裹，跟住放入密實袋；第三組完全唔用保鮮紙，只係將成梳香蕉分開成每條，然後每條各自放入普通膠袋；第四組就係將每條香蕉用報紙包好，再放入密實袋。

三星期後拎出嚟比較外觀同果肉，結果出乎意料——最簡單、成本最低嘅第三組，即係每條香蕉分開放入普通膠袋嗰組，保鮮狀態最好。實驗者指出，用手摸落去已經可以感受到明顯分別，其他組別有啲香蕉皮已經變黑，切開後果肉都開始腐爛。

一般嚟講，香蕉喺雪櫃嘅保存期大約係一到兩星期。雖然呢個實驗發現用膠袋逐條包裝有機會延長存放時間，但唔代表所有香蕉都可以安全存放三星期。實際可以保存幾耐，仲要睇香蕉本身嘅成熟程度同雪櫃溫度等因素。特別係香蕉皮已經出現大面積明顯變黑嘅時候，食之前一定要小心切開檢查果肉有冇異常或者腐爛，千祈唔好淨係靠存放日數判斷。